Këmbë të lodhura dhe të rënda, qarkullim i dobët
Stili i sotëm i jetesës, zakonet e punës, qëndrimi i gjatë ulur ose në këmbë, çojnë në shqetësime që shumë shpesh rezultojnë me këmbë të lodhura dhe të rënda, qarkullim të dobët dhe vena të zgjeruara.
Sindroma e këmbëve të lodhura zakonisht është rezultat i sforcimit, qëndrimit të gjatë ulur ose në këmbë, por mund të lidhet edhe me faktorë gjenetikë, qarkullim të dobët dhe vena të zgjeruara.
Këshillat për lehtësimin e këtyre shqetësimeve përfshijnë më shumë lëvizje dhe përdorimin e këpucëve të rehatshme, si dhe shmangien e takave të larta. Aktiviteti fizik i rregullt dhe i vazhdueshëm është shumë i rëndësishëm – noti, ecja dhe çiklizmi janë zgjedhje ideale. Një rekomandim tjetër është edhe dushi i këmbëve me ujë të ngrohtë dhe të ftohtë në mënyrë alternative, për të përmirësuar qarkullimin e gjakut.
Përbërësit natyralë të gështenjës së egër dhe lules së kalendulës kanë efekt të provuar në këto probleme.
Përbërësi aktiv i gështenjës së egër, escina, ndihmon në stabilizimin e mureve të enëve venoze të gjakut, duke ndikuar në uljen e ënjtjes dhe dhimbjes. Ajo qetëson proceset inflamatore, rrit qëndrueshmërinë e enëve të gjakut, forcon kapilarët venozë dhe ul përshkueshmërinë ndaj lëngjeve, duke reduktuar kështu ngarkesën mbi venat dhe ënjtjen.
Më shpesh përdoret në formë geli ose kremi (veprim lokal).
Lulja e kalendulës është e njohur prej kohësh për veprimin e saj të dobishëm. Për qëllime parandaluese kundër kapilarëve të çarë dhe venave të zgjeruara ekzistojnë preparate dhe balsame të ndryshme me bazë kalendule dhe kamomili.
Problemi i venave të zgjeruara dhe kapilarëve të dukshëm shfaqet më shpesh te gratë nga mosha 25 deri në 55 vjeç, prandaj kujdesi parandalues është shumë i rëndësishëm dhe efektiv.
